Erlyniad Bwyd Anifeiliaid Anwes Amrwd : Cyngor Bwrdeistref Sirol Castell-nedd Port Talbot Safonau Masnach

Roedd Happy Hounds (Wales) Limited, ar Ystad Ddiwydiannol Cwmgors, Cwmgors, Gwauncaegurwen,  wedi’i fonitro gan Safonau Masnach Castell-nedd Port Talbot ac Iechyd Anifeiliaid dros nifer o flynyddoedd.

Roedd y busnes yn prynu cig gwastraff ac offal o nifer o ffynonellau, fel lladd-dai; ffatrïoedd torri; a chwmnïau pacio cig; i'w hailbrosesu a'u gwerthu fel bwyd ci amrwd. Fodd bynnag, ni sicrhaodd y cwmni fod ei gynhyrchion yn ddiogel o ran bacteria a chlefydau sy'n cael eu cario mewn bwyd anifeiliaid/bwyd, y gellid eu trosglwyddo i anifeiliaid anwes a'u perchnogion.

Canfuwyd bod cyfres o samplau o fwyd anifeiliaid anwes a brofwyd o gynhyrchion y busnes yn cynnwys salmonela a bacteriwm arall sy'n uwch na'r lefelau a ganiateir, gan olygu nad ydynt yn ddiogel ym marn y dadansoddwr cyhoeddus.

Ar 11 Medi 2023, plediodd Derrick Lewis, 67, o Dan y Deri, Rhydaman, Sir Gaerfyrddin, Cyfarwyddwr Happy Hounds (Wales) Limited,  yn euog yn Llys Ynadon Abertawe i bum cyhuddiad o werthu bwyd anifeiliaid ar y farchnad a dau gyhuddiad o gynnal mangre aflan. Mae'r cwmni yn y broses o’i ddirwyn i ben.

Dywedodd y Barnwr Rhanbarth Layton fod Mr Lewis, dros gyfnod o amser, wedi torri rheoliadau, gan roi bwyd anifeiliaid anniogel ar y farchnad gan esgeuluso ei gyfleusterau prosesu.  Ychwanegodd y Barnwr Layton fod Mr Lewis wedi derbyn sgil-gynhyrchion heb unrhyw werth iddynt, ac wedi'u troi'n fwyd anifeiliaid, heb ddilyn y gweithdrefnau swyddogol. 

Dedfrydwyd Mr Lewis i 18 wythnos yn y ddalfa, a gafodd ei ohirio am 12 mis, i gyd-rhedeg â phob cyhuddiad; mae’n rhaid iddo dalu £15,000 fel cyfraniad tuag at gostau'r cyngor; a thalu gordal dioddefwr o £128.

Meddai'r Cynghorydd Cen Phillips, Aelod y Cabinet dros Natur, Twristiaeth a Lles,

"Mae Cyngor Castell-nedd Port Talbot yn cymryd diogelwch y cyhoedd o ddifrif. Gwnaed ymdrechion dro ar ôl tro i gynghori'r cwmni i gydymffurfio â rheoliadau i ddiogelu iechyd y cyhoedd. O ganlyniad, nid oedd gan Safonau Masnach ac Iechyd Anifeiliaid unrhyw ddewis ond erlyn y busnes.

Dylai busnesau fod yn ymwybodol y byddai'n well gan Safonau Masnach ac Iechyd Anifeiliaid weithio gyda nhw, ond os nad ydynt yn cydymffurfio â'r rheoliadau sydd ar waith i amddiffyn y cyhoedd, yna byddant yn cymryd cam gweithredu cadarn."

Llun gan James Lacy ymlaen Unsplash