Pwysigrwydd Safonau Masnach wrth ddiogelu diogelwch defnyddwyr
Mae ymgyrch Safonau Masnach Cymru eleni yn ymwneud â chodi ymwybyddiaeth o’r gwaith eang sy’n cael ei wneud gan swyddogion Safonau Masnach ledled Cymru.
Rydym ni i gyd yn ddefnyddwyr - boed hynny’n prynu teganau i blant yn ein bywydau, bwyd ar gyfer pryd teuluol, eitemau trydanol ar gyfer ein cartrefi, neu trefnu gwelliannau neu atgyweiriadau lle’r ydym yn byw. Bob tro y byddwn yn prynu nwyddau neu wasanaethau, mae yna risg bosibl. Mae swyddogion Safonau Masnach yn gweithio’n galed i ddiogelu pawb rhag cynhyrchion anniogel, arferion annheg a masnachwyr twyllodrus, gan helpu i gadw pob defnyddiwr yn ddiogel ac yn hyderus.
Mae ymgyrch Safonau Masnach Cymru eleni yn ymwneud â chodi ymwybyddiaeth o’r gwaith eang sy’n cael ei wneud gan swyddogion Safonau Masnach ledled Cymru. Dros gyfnod o dri diwrnod, byddwn yn taflu goleuni ar un o’n meysydd allweddol – diogelwch defnyddwyr. Bydd modd i chi hefyd wylio cyfres o bodlediadau a fideos byr sy’n eich cyflwyno i’ch swyddogion lleol a’r gwaith pwysig y maent yn ei wneud i gadw defnyddwyr yn ddiogel.
Mae Safonau Masnach Cymru yn dod â’r holl wasanaethau Safonau Masnach ledled Cymru ynghyd mewn partneriaeth gydweithredol. Drwy weithio ar y cyd, rydym yn sicrhau cysondeb ar draws ffiniau awdurdodau lleol ac yn canolbwyntio ein hymdrechion ar y materion sy’n bwysicaf i’r cyhoedd ac i fusnesau. Trwy rannu adnoddau ar brosiectau allweddol, gallwn wneud y defnydd gorau o gyllidebau sy’n lleihau, targedu gweithgarwch troseddol yn fwy effeithiol, a darparu cefnogaeth gryfach i fusnesau dilys.
Dros y flwyddyn ddiwethaf, bydd swyddogion ein hawdurdod wedi bod yn cymryd rhan mewn rhai o’r prosiectau ar y cyd hyn, ac rydym yn croesawu’r cyfle i ddweud mwy wrthych am sut rydym yn defnyddio dull sy’n seiliedig ar wybodaeth ac yn gweithio mewn partneriaeth ag awdurdodau eraill i wneud yr effaith fwyaf ac i gyflawni ein dangosyddion perfformiad allweddol.
Mae’n gyfle gwych i ni rannu mwy â chi am yr hyn a wnawn a pham ein bod yn ei wneud - ac rydym yn eich gwahodd i ymweld â’n gwefan i ddysgu mwy:
https://safonaumasnach.llyw.cymru/cym/tswweek/ a dilynwch @WalesTS ar ‘X’ i ddysgu mwy am yr hyn y mae awdurdodau eraill yn ei wneud hefyd.
Efallai eich bod eisoes yn gyfarwydd â waith amrywiol Safonau Masnach drwy ein herlyniadau lleol a’n datganiadau i’r wasg, ond hoffem gael y cyfle i ddweud wrthych am rai o’r meysydd eraill o’n gwaith nad ydych efallai’n sylweddoli sy’n cael effaith ar y Cyngor, er enghraifft, effeithlonrwydd ynni, diogelu, a diogelu busnesau lleol.