Perchennog siop yn cael ei ddedfrydu am werthu nwyddau ffug

08/11/2024

Cafodd Azad Ekram Ahmad, 31 oed o Broadway, Caerdydd, ei ddedfrydu yn Llys y Goron, Casnewydd, ar 17 Hydref. Plediodd Ahmad yn euog i bedair trosedd a chafodd ddedfryd o 9 mis o garchar wedi’i gohirio am 12 mis, yn ogystal â chael ei orchymyn i gwblhau 200 awr o waith di-dâl, ymgymryd â gweithgaredd adsefydlu 5 diwrnod, a thalu gordal dioddefwr o £187 a chostau o £750 i Gyngor Bwrdeistref Sirol Caerffili.

Yn ystod cyfnod y troseddau, Ahmad oedd perchennog Ystrad Mini Market, Ystrad Mynach. Ym mis Ionawr 2023, prynodd tîm Safonau Masnach Cyngor Caerffili sigaréts o'r siop fel prawf, ar ôl cael gwybodaeth bod y safle'n cael ei ddefnyddio i werthu sigaréts ffug. Roedd y sigaréts a gafodd eu prynu y tro hwn yn ffug.

Ychydig ddyddiau'n ddiweddarach, fe wnaeth y tîm Safonau Masnach gynnal cyrch ar y safle, yng nghwmni ci synhwyro tybaco, lle daethon nhw o hyd i 8,500 o sigaréts ffug ac ychydig dros 2kg o dybaco rholio â llaw ffug wedi'u cuddio y tu ôl i'r cownter.

Yn ystod y chwiliad, fe wnaeth swyddogion hefyd atafaelu 54 o fêps untro anghyfreithlon, nad oedden nhw’n cydymffurfio â'r rheoliadau diogelwch gan eu bod nhw’n cynnwys mwy na'r 2ml o nicotin a ganiateir a'u bod nhw wedi'u labelu'n anghywir.

Fe wnaeth swyddogion hefyd atafaelu 35 o boteli o ddiodydd meddal Fanta â labeli tramor, na chaniateir eu gwerthu yn y Deyrnas Unedig gan nad oedden nhw wedi’u labelu yn Saesneg, gan wrthod y cyfle i gwsmeriaid gael gwybodaeth am eu cynnwys, a allai fod yn hanfodol i’r rhai ag alergeddau bwyd.

Dywedodd y Cynghorydd Philippa Leonard, Aelod Cabinet â chyfrifoldeb am ddiogelu’r cyhoedd yng Nghyngor Caerffili, “Mae cynhyrchion ysmygu a diodydd anghyfreithlon yn peri risgiau difrifol i iechyd defnyddwyr. Mae'r achos hwn yn dangos effeithiolrwydd ein tîm Safonau Masnach wrth fynd i'r afael â gwerthu eitemau o'r fath. Rydyn ni’n gobeithio bod y ddedfryd yn anfon neges gref i fasnachwyr twyllodrus eraill ac yn eu hatal.”

Erthygl flaenorol Erthygl Nesaf