Bridiwr cŵn didrwydded Sir Gaerfyrddin yn cael ei ddwyn o flaen ei well

Enillodd Deborah Thomas, o Landddarog, dros £90,000 ar ôl gwerthu 9 torraid o gŵn bach dros gyfnod o 12 mis, heb y drwydded briodol. Roedd Thomas wedi cael cyngor gan Gyngor Sir Caerfyrddin o'r gofynion trwyddedu ar sawl achlysur ond parhaodd i weithredu'n anghyfreithlon.

O dan Reoliadau Bridio Cŵn 2014 mae'n anghyfreithlon hysbysebu 12 thorraid o gŵn bach neu fwy o'r un safle  mewn cyfnod treigl o 2014 mis heb drwydded bridio cŵn. Mae Rheoliadau Trwyddedu Gweithgareddau sy’n Ymwneud ag Anifeiliaid 2021 hefyd yn golygu y gallai fod angen trwydded ar unrhyw un sy'n ymwneud â gwerthu anifeiliaid anwes yn fasnachol. 

Mewn erlyniad dan arweiniad Cyngor Sir Caerfyrddin, dywedwyd wrth y llys fod swyddogion lles anifeiliaid wedi ymchwilio i weithgarwch bridio anghyfreithlon Thomas yn dilyn gwybodaeth a dderbyniwyd gan yr adran. Roedd gwybodaeth a ddarparwyd gan lwyfannau hysbysebu Gumtree, Pets4Homes, Preloved a Freeads yn tynnu sylw at raddfa'r gweithgarwch, ac yn rhoi'r dystiolaeth sydd ei hangen er mwyn i'r achos fynd yn ei flaen.

Cafwyd gorchymyn atafaelu o dan y Ddeddf Enillion Troseddau am £90,000, sy'n daladwy o fewn 3 mis, ac roedd Thomas hefyd yn gorfod talu £10,000 o gostau ychwanegol. Cafodd Thomas ddirwy o £1000 am y drosedd a rhaid iddi dalu gordal dioddefwr o £100, sy'n daladwy o fewn 12 mis.

Bydd methu â thalu'r gorchymyn atafaelu yn arwain at ddedfryd diffygdalu o 21 mis.

Dywedodd y Cynghorydd Aled Vaughan Owen, yr Aelod Cabinet dros Newid Hinsawdd, Datgarboneiddio a Chynaliadwyedd: “Rhaid i mi ganmol gwaith ein swyddogion iechyd anifeiliaid wrth ddod â'r bridiwr cŵn anghyfreithlon hwn o flaen ei gwell.

“Mae'n bwysig iawn bod bridwyr cŵn sy'n dymuno gwerthu cŵn yn fasnachol yn cael y drwydded gywir fel y gallwn ni, fel Cyngor, fonitro lles yr anifeiliaid dan sylw yn gywir. Fel y mae'r achos hwn yn ei brofi, bydd y Cyngor yn gweithredu yn erbyn unrhyw fridiwr cŵn nad yw'n cydymffurfio â'r gofyniad hwn.”

Delweddau gan Elena Mozhvilo a Joshua Sukoff rhag Unsplash