Parhau i gau siopau fêps anghyfreithlon yn Abertawe

Yn ddiweddar, mae Cyngor Abertawe wedi cymryd camau yn erbyn dwy siop fêps yn y ddinas, gan wneud cais llwyddiannus i Lys Ynadon Abertawe i'w cau am dri mis.

Gorchmynnwyd i siop World of Vapes yn St Teilos Street, Pontarddulais, gau am y cyfnod estynedig ar ôl i dîm Safonau Masnach Cyngor Abertawe ymweld â'r siop yn gynharach ym mis Mehefin a darganfod tybaco a fêps ffug mewn uned storio gudd.

Cafodd siop Snoop Vapes ar y Stryd Fawr yng nghanol y ddinas ei chau hefyd ar ôl gwerthu tybaco ffug dro ar ôl tro i swyddogion safonau masnach cudd dros gyfnod o ddau fis.

Mae'r tîm Safonau Masnach bellach wedi cadarnhau y bydd rhagor o siopau'n cael eu targedu a'u cau yn dilyn gwybodaeth barhaus a phryniadau prawf o siopau.

Meddai Rhys Harries, Arweinydd Tîm Safonau Masnach Cyngor Abertawe, "Rydym yn ymrwymedig i fynd i'r afael â gwerthiant tybaco a fêps anghyfreithlon yn llawer o'r siopau hyn, y mae'r nwyddau hyn yn aml yn cael eu gwerthu i blant.

"Mae gennym bwerau i gau siopau ar ôl i ni ymweld â nhw ond mae angen cymorth y llysoedd arnom i ymestyn y cyfnod cai dros dro i dri mis. Drwy wneud hyn, rydym yn gobeithio y bydd yn tarfu ar fasnach ac yn atal y nwyddau niweidiol hyn rhag cael eu gwerthu i blant iau.

"Ond mae rhagor i ddod. Rydym wedi parhau i gasglu gwybodaeth a bydd rhagor o siopau'n cael eu cau eleni."

Mae'r ymgyrch barhaus i geisio atal gwerthiannau fêps anghyfreithlon yn dilyn ymgyrch ehangach ym mis Hydref 2025 pan ymunodd y tîm Safonau Masnach â Heddlu De Cymru i gynnal cyrchoedd ar siopau ledled Abertawe, lle'r oedd gwybodaeth wedi dangos bod y siopau yn gwerthu nwyddau anghyfreithlon.

Caewyd cyfanswm o naw siop yn ystod y cyrchoedd ym mis Hydref ac atafaelwyd mwy na £70,000 o dybaco a fêps anghyfreithlon.

Meddai Andrew Williams, Aelod Cabinet Cyngor Abertawe dros Ddatblygu, "Mae'r cyngor hwn yn cymryd gwerthiant fêps anghyfreithlon a thybaco ffug yn Abertawe o ddifrif.

"Mae ein tîm Safonau Masnach wedi rhoi blaenoriaeth i'r mater hwn ac wedi gallu casglu llawer iawn o gudd-wybodaeth o ran pa siopau yn y ddinas sydd wedi bod yn gwerthu nwyddau anghyfreithlon yn flaenorol i gwsmeriaid, gan gynnwys plant.

"Mae'r ymgyrch ddiweddaraf wedi bod yn llwyddiannus iawn yn ein hymdrechion i atal y math hwn o fasnach ac rydym yn gobeithio y bydd yn anfon neges gref iawn at fusnesau eraill yn y ddinas, gan bwysleisio bod ganddyn nhw ddyletswydd i sicrhau eu bod nhw'n masnachu'n gyfreithlon ac nad ydyn nhw'n peryglu defnyddwyr."