Safonau Masnach y Cyngor yn cymryd rhan yn Ymgyrch Machinize 2: menter genedlaethol wedi'i chydlynu i atal troseddau ar y stryd fawr

21/11/2025

Cafodd Ymgyrch Machinize 2 ei chynnal, dan arweiniad yr Asiantaeth Troseddu Cenedlaethol ac mewn cydweithrediad â Chyngor Cenedlaethol Penaethiaid yr Heddlu, drwy gydol mis Hydref ac roedd yn cynnwys pob heddlu ac Uned Troseddau Cyfundrefnol Rhanbarthol yn y Deyrnas Unedig, adran Gorfodi Mewnfudo'r Swyddfa Gartref, Safonau Masnach, Cyllid a Thollau EF a Tŷ'r Cwmnïau. Yn ystod yr ymgyrch, cyflawnodd y bartneriaeth y canlynol:

•             Cafodd 2,734 o adeiladau eu hymweld a'u cyrchu
•             Cafodd 924 o unigolion eu harestio
•             Cafodd dros £10.7 miliwn o enillion troseddau posibl eu hatafaelu
•             Cafodd dros £2.7 miliwn o nwyddau anghyfreithlon eu dinistrio

Mae'r ffigurau hyn yn cynnwys cael gwared â 70 cilogram o ganabis o'n strydoedd ni, 111,000 o fêps niweidiol, anghyfreithlon, 4.5 miliwn o sigaréts anghyfreithlon a 622 cilogram o dybaco anghyfreithlon (sy'n cyfateb i osgoi talu £3.5 miliwn mewn tolldaliadau). Cafodd 341 o Hysbysiadau Atgyfeirio eu cyhoeddi am weithio a rhentu anghyfreithlon hefyd, sy'n golygu y gallai busnesau wynebu dirwyon o hyd at £60,000 fesul gweithiwr gyda landlordiaid yn wynebu dirwyon o hyd at £20,000 fesul tenant os maen nhw’n cael eu canfod yn atebol. Hefyd, mae dros 450 o gwmnïau wedi cael eu hatgyfeirio at Dŷ'r Cwmnïau ar gyfer ymchwilio ymhellach.

Dyma'r ymgyrch fwyaf o'i math sy'n canolbwyntio ar gael gwared ar y troseddau economaidd a'r economi lwyd sy'n gwneud ein strydoedd mawr yn llai diogel a ffyniannus.

Beth yw Ymgyrch Machinize?

Mae'r Asiantaeth Troseddu Cenedlaethol yn amcangyfrif bod o leiaf £12 biliwn o arian parod troseddol yn cael ei gynhyrchu yn y Deyrnas Unedig bob blwyddyn, sydd, fel arfer, yn cael ei smyglo allan o'r wlad neu ei integreiddio i systemau ariannol, yn aml i'w fwydo’n ôl i weithgareddau troseddol.

Mae busnesau ar y stryd fawr fel siopau bach cyfleustra, siopau barbwr, siopau fêps, bariau ewinedd a lleoedd golchi ceir i wneud i enillion troseddau ymddangos fel elw cyfreithlon busnes masnachol neu wasanaeth. Mae busnesau'r stryd fawr hefyd yn cael eu defnyddio i werthu cynhyrchion anghyfreithlon ac osgoi talu treth, ac yn aml, maen nhw’n gysylltiedig â mathau eraill o droseddoldeb fel cyflenwi cyffuriau a'r trais difrifol y mae'n ei achosi.

Yn gynharach eleni, sefydlodd yr Asiantaeth Troseddu Cenedlaethol Ymgyrch Machinize ar ôl nodi bod camfanteisio troseddol gan fusnesau'r stryd fawr y tu hwnt i gwmpas un sefydliad yn unig. Gan weithio mewn partneriaeth â Chyngor Cenedlaethol Penaethiaid yr Heddlu, mae'n anelu at sefydlu ymateb gweithredol ar raddfa fawr i broblem amlochrog. Mae'r dull hwn – wedi'i gydlynu'n genedlaethol ac wedi'i chyflawni yn ein cymunedau – yn sicrhau'r defnydd mwyaf effeithiol o bwerau a galluoedd, gan fanteisio ar gryfderau a chyfrifoldebau pob asiantaeth sy'n cymryd rhan.

Cafodd Ymgyrch Machinize ei sefydlu i dargedu troseddau economaidd ar y stryd fawr gyda'r iteriad hwn hefyd yn canolbwyntio ar yr economi lwyd. Mae gorgyffwrdd hysbys â chamfanteisio gan fusnesau ar y stryd fawr, gweithio anghyfreithlon ac osgoi talu tollau a threthi. Mae'r gorgyffwrdd hwn hefyd yn cynnwys caethwasiaeth fodern ac amodau byw a gwaith anaddas, ac mae diogelu unigolion sy'n wynebu risg yn parhau i fod yn flaenoriaeth i'r bartneriaeth.

Dywedodd y Cynghorydd Phillipa Leonard, Aelod Cabinet dros Gynllunio a Diogelu'r Cyhoedd, "Mae Ymgyrch Machinize wedi dangos beth sy’n gallu cael ei gyflawni pan fydd gwybodaeth leol a chydlynu cenedlaethol yn dod at ei gilydd. Yng Nghaerffili, rydyn ni’n falch o chwarae ein rhan wrth fynd i'r afael â rhwydweithiau troseddol sy'n manteisio ar ein strydoedd mawr, amddiffyn busnesau lleol, cadw ein cymunedau'n ddiogel, a sicrhau bod ein canol trefi yn parhau i fod yn lleoedd lle gall menter gyfreithlon ffynnu."

Erthygl flaenorol